做咗幾年網頁設計，見過唔少客戶畀之前嘅設計公司「坑」完，再搵我哋幫手執手尾。有啲係技術問題，有啲係溝通問題，有啲根本係詐騙。
今日想同大家分享下揀網頁設計公司時常見嘅陷阱，希望幫到正在考慮做網站嘅朋友。
陷阱一：報價超平但無講清楚包乜
「$3,000 包設計網站」——呢類廣告你一定見過。但細問之下，可能發現：
- 用現成模板，改下 logo 同顏色就交貨
- 只包 5 頁，每多一頁要額外收費
- 唔包域名、寄存、SSL 證書
- 上線後要改任何嘢都要收錢
- 完全無 SEO 設定
唔係話平嘢一定唔好，但「平」通常係有原因嘅。報價時一定要問清楚：具體包啲乜、用乜嘢技術做、上線後支援安排、將來改嘢點計費。
最理想係攞到詳細嘅報價單，逐項列明。
陷阱二：無 Portfolio 或者 Portfolio 造假
正當嘅設計公司應該有作品集展示過往項目。但要小心：
- 有啲公司會放別人嘅作品當自己嘅
- 有啲會放設計稿（mockup）而唔係真正上線嘅網站
- 有啲作品可能已經幾年前，技術過時
點樣驗證？好簡單，揀幾個 portfolio 入面嘅網站，直接上去睇下。如果個網站真係存在、設計同 portfolio 一致、而且運作正常，咁就可信度高啲。
更好嘅做法係問公司攞客戶 reference，直接同舊客傾下合作體驗。
陷阱三：承諾「保證 Google 排名第一」
呢個係經典嘅紅旗。
Google 嘅排名演算法極之複雜，而且經常更新。無任何人可以「保證」排名結果。如果有公司咁樣承諾，通常係：
- 用緊違規手法（Black Hat SEO）：短期可能有效，但遲早被 Google 懲罰，甚至整個網站被下架
- 講嘅係冷門關鍵字：例如保證「深水埗區24小時維修曲奇餅乾機」排第一——根本無人搜尋呢啲字
- 純粹講大話
正當嘅 SEO 服務會話畀你聽：我哋會做咩優化工作、預計幾耐開始見到改善、但唔會保證特定排名。
陷阱四：設計完成後源碼唔畀你
呢個陷阱好多人踩完先知。
有啲公司會話：網站係我哋整嘅，源碼係我哋嘅。你只係付費用佢，唔係擁有佢。結果你想換供應商或者自己改嘢，佢可以獅子開大口收取「源碼購買費」。
簽約前一定要確認：項目完成後，網站嘅完整源碼、設計檔案會唔會交畀你。呢個應該寫清楚喺合約入面。
陷阱五：無售後支援或者支援形同虛設
網站上線唔係終點，而係開始。之後你可能需要：
- 更新內容
- 修復 bug
- 處理安全問題
- 技術支援
好多公司喺銷售階段好積極，一收完錢就消失。你發訊息無人覆、打電話無人聽、email 石沉大海。
點樣避免？可以問下佢哋現有客戶嘅售後體驗、睇下公司有幾多年歷史（太新嘅可能隨時執笠）、合約有無寫明支援範圍同回應時間。
點樣搵到合適嘅公司？
綜合以上，揀網頁設計公司時建議：
- 格價但唔好只睇價錢 — 了解每個報價包括同唔包括乜嘢
- 驗證作品 — 睇真正上線緊嘅網站，唔係 PDF 或圖片
- 問清楚技術細節 — 用乜嘢技術、將來容唔容易改
- 確認擁有權 — 源碼、域名、寄存帳戶要屬於你
- 了解售後安排 — 有無維護計劃、回應時間幾耐
- 簽好合約 — 所有口頭承諾要寫低
最後，信任你嘅直覺。如果傾計過程中覺得對方唔專業、態度差、或者畀人感覺「太好」，寧願多搵幾間比較。
我成日同客戶講：搵網頁設計公司就好似搵拍檔，最好係長期合作關係。所以除咗考慮價錢同技術，「合唔合得嚟」都好重要。
如果你正在搵緊網頁設計服務，歡迎聯絡我哋傾下，睇下我哋係咪適合你。
Alex Chan
404web 團隊致力為香港企業提供專業的網頁設計與數碼營銷服務。